1 Samuel 1
1 Samuel 1:1
ሀለወ፡ ብእሲ፡ አሐዱ፡ ዘእምነ፡ አርማቴም፡ ሲፋ፡ እምነ፡ ደብረ፡ ኤፍሬም፡ ወስሙ፡ ሕልቃና፡ ወልደ፡ ኢያሬምያል፡ ወልደ፡ ኤሊ፡ ወልደ፡ ቶቄ፡ ወልደ፡ ናሴብ፡ ኤፍራታዊ።
1 Samuel 1:2
ወቦ፡ ክልኤተ፡ አንስተ ፤ ስማ፡ ለአሐቲ፡ ሐና፡ ወስማ፡ ለካልእታ፡ ፍናና ፤ ወባቲ፡ ፍናና፡ ደቂቀ፡ ወሐናሰ፡ አልባቲ፡ ውሉደ።
1 Samuel 1:3
ወየዐርግ፡ ውእቱ፡ ብእሲ፡ ለለመዋዕል፡ እምነ፡ ሀገሩ፡ አርማቴም፡ ከመ፡ ይስግድ፡ ወይሡዕ፡ ለእግዚአብሔር፡ በሴሎም፡ ወሀለዉ፡ ህየ፡ ኤሊ፡ ወደቂቁ፡ ክልኤቱ፡ ኦፍኒ፡ ወፊንሐስ፡ ካህናቲሁ፡ ለእግዚአብሔር።
1 Samuel 1:4
ወእምዝ፡ በአሐቲ፡ ዕለት፡ ሦዐ፡ ሕልቃና፡ ወወሀቦሙ፡ ክፍሎሙ፡ ለፍናና፡ ብእሲቱ፡ ወለደቂቃ።
1 Samuel 1:5
ወለሐናሂ፡ ወሀባ፡ አሐደ፡ ክፍለ፡ እስመ፡ አልባቲ፡ ውሉደ፡ ወባሕቱ፡ ሐናሃ፡ ያፈቅር፡ ሕልቃና፡ እምእንታክቲ፡ ወዐጸዋ፡ እግዚአብሔር፡ ማሕፀና።
1 Samuel 1:6
ወኢወሀባ፡ እግዚአብሔር፡ ውሉደ፡ በከመ፡ ሥቃያ፡ ወበከመ፡ ሐዘነ፡ ትካዛ፡ ወተሐዝን፡ በበይነ፡ ዝንቱ፡ እስመ፡ ዐጸወ፡ እግዚአብሔር፡ ማሕፀና፡ ወኢወሀበ፡ ውሉዶ።
1 Samuel 1:7
ወከመዝ፡ ይገብር፡ ለለዓመት፡ የዐርግ፡ ውስተ፡ ቤተ፡ እግዚአብሔር፡ ወይእቲሰ፡ ትቴከዝ፡ ወትበኪ፡ ወኢትበልዕ።
1 Samuel 1:8
ወይቤላ፡ ሕልቃና፡ ምታ፡ ሐና፡ ወትቤ፡ ነየ፡ እግዚእየ፡ ወይቤላ፡ ምንተ፡ ኮንኪ፡ ወምንት፡ ያበክየኪ፡ ወለምንት፡ ኢትበልዒ፡ ወለምንት፡ ትቀሥፊ፡ ልበኪ፡ ኢይኄይሰኪኑ፡ አነ፡ እምዐሠርቱ፡ ውሉድ።
1 Samuel 1:9
ወተንሥአት፡ እምድኅረ፡ በልዑ፡ በሴሎም፡ ወቆመት፡ ቅድመ፡ እግዚአብሔር፡ (በሴሎም)፡ ወኤሊ፡ ካህን፡ ይነብር፡ ውስተ፡ መንበር፡ ኀበ፡ መድረከ፡ ኆኅት፡ ዘቤተ፡ እግዚአብሔር።
1 Samuel 1:10
ወይእቲሰ፡ በሐዘነ፡ ነፍሳ፡ በከየት።
1 Samuel 1:11
ወጸለየት፡ ኀበ፡ እግዚአብሔር፡ ወትቤ፡ በፃእኩ፡ ብፅአተ፡ ለእግዚአብሔር፡ አዶናይ፡ እግዚእ፡ ኤሎሄ፡ ጸባኦት፡ ለእመ፡ ነጽሮ፡ ነጸርከ፡ ላዕለ፡ ሕማማ፡ ለአመትከ፡ ወተዘከርከኒ፡ ወወሀብከ፡ ለአመትከ፡ ዘርአ፡ ብእሴ፡ ወእሁቦ፡ ቅድሜከ፡ ሀብተ፡ እስከ፡ አመ፡ ይመውት ፤ ወይነ፡ ወሜሰ፡ ኢይሰቲ፡ ወሐፂን፡ ኢየዐርግ፡ ውስተ፡ ርእሱ።
1 Samuel 1:12
ወእምዝ፡ ሶበ፡ አኅለቀት፡ ጸልዮ፡ ቅድመ፡ እግዚአብሔር፡ ወኤሊሰ፡ ካህን፡ ይትዐቀብ፡ አፉሃ።
1 Samuel 1:13
ወይእቲኒ፡ ትነብብ፡ በልባ፡ ወተሐውስ፡ ከናፍሪሃ፡ ወኢይሰማዕ፡ ቃላ፡ ወአምሰላ፡ ኤሊ፡ ከመ፡ ስክርት፡ ይእቲ።
1 Samuel 1:14
ወይቤላ፡ ቍልዒሁ፡ ለኤሊ፡ እስከ፡ ማእዜኑ፡ ዝንቱ፡ ስካርኪ ፤ አሰስሊ፡ ወይነኪ፡ ወእምቅድመ፡ እግዚአብሔር፡ ፃኢ።
1 Samuel 1:15
ወተሠጥወቶ፡ ሐና፡ ወትቤሎ፡ አልቦ፡ እግዚኦ ፤ ብእሲት፡ እኪተ፡ መዋዕል፡ አነ ፤ ወይነሰ፡ ወሜሰ፡ ኢሰተይኩ፡ ወእክዕዋ፡ ለነፍስየ፡ ቅድመ፡ እግዚአብሔር።
1 Samuel 1:16
ወኢትረስያ፡ ለአመትከ፡ ከመ፡ አዋልድ፡ ርኩሳት፡ እስመ፡ እምብዝኀ፡ ሐዘንየ፡ ተመሰውኩ፡ እስከ፡ ይእዜ።
1 Samuel 1:17
ወተሠጥዋ፡ ኤሊ፡ ወይቤላ፡ ሖሪ፡ በሰላም፡ አምላከ፡ እስራኤል፡ (የህሉ፡ ምስሌኪ፡ ወ)የሀብኪ፡ ስእለተኪ፡ ኵሎ፡ ዘሰአልኪ፡ በኀቤሁ።
1 Samuel 1:18
ወትቤሎ፡ ሐና፡ ረከበት፡ ሞገሰ፡ አመትከ፡ በቅድሜከ፡ (እግዚኦ፡) ወሖረት፡ ይእቲ፡ ብእሲት፡ ፍኖታ፡ ወቦአት፡ ቤታ፡ ወበልዐት፡ ምስለ፡ ምታ፡ ወሰትየት፡ ወኢያውደቀት፡ ገጻ፡ እንከ።
1 Samuel 1:19
[ወተንሥኡ፡ በጽባሕ፡] ወሰገዱ፡ ለእግዚአብሔር፡ ወሖሩ፡ በፍኖቶሙ፡ ወቦአ፡ ሕልቃና፡ ውስተ፡ ቤቱ፡ ውስተ፡ አርማቴም፡ ወአእመራ፡ ስሐና፡ ብእሲቱ፡ ወተዘከራ፡ እግዚአብሔር፡ ወፀንሰት።
1 Samuel 1:20
ወእምዝ፡ አመ፡ በጽሐ፡ ጊዜ፡ መዋዕሊሁ፡ ለወሊዶታ፡ ወለደት፡ ወልደ፡ ወሰመየቶ፡ ስሞ፡ ሳሙኤል፡ እስመ፡ እምኀበ፡ እግዚአብሔር፡ ጸባኦት፡ ውእቱ፡ ትቤ፡ እስመ፡ ሰአልክዎ።
1 Samuel 1:21
ወዐርገ፡ ሕልቃና፡ ወኵሉ።
1 Samuel 1:22
ቤቱ፡ ከመ፡ ይሡዕ፡ በሴሎም፡ መሥዋዕተ፡ መዋዕል፡ ወብፅዓቲሁ፡ ወኵሎ፡ ዓሥራተ፡ ምድር።
1 Samuel 1:23
ወሐናሰ፡ ኢዐርገት፡ ምስሌሁ፡ እስመ፡ ትቤሎ፡ ለምታ፡ እስከ፡ አመ፡ የዐርግ፡ ሕፃን፡ ምስሌየ፡ አመ፡ አኅደግዎ፡ ጥበ፡ ወያስተርኢ፡ ቅድመ፡ ገጹ፡ ለእግዚአብሔር፡ ወይነብር፡ ህየ፡ እስከ፡ ለዓለም።
1 Samuel 1:24
ወይቤላ፡ ምታ፡ ግበሪ፡ ዘከመ፡ ይኤድመኪ፡ ለአዕይንትኪ፡ ወንበሪ፡ እስከ፡ አመ፡ ታኀድግዮ፡ ጥበ፡ ወባሕቱ፡ አቅሚ፡ ለእግዚአብሔር፡ ዘወፅአ፡ እምአፉኪ ፤ ወነበረት፡ ይእቲ፡ ብእሲት፡ ወሐፀነት፡ ወልዳ፡ እስከ፡ አመ፡ አኅደገቶ፡ ጥበ።
1 Samuel 1:25
ወዐርገት፡ ምስሌሁ፡ ውስተ፡ ሴሎም፡ ወነሥአት፡ ላህመ፡ ዘ፫ዓመቱ፡ ወኅብስተ፡ ወመስፈርተ፡ ኤፍ፡ ስንዳሌ፡ ወመስፈርተ፡ ኔባል፡ ወይነ፡ ወቦአት፡ ቤተ፡ እግዚአብሔር፡ በሴሎም፡ ወወልዶሙኒ፡ ምስሌሆሙ።
1 Samuel 1:26
ወአብኡ፡ ቅድመ፡ እግዚአብሔር፡ ወጠብሐ፡ አቡሁ፡ መሥዋዕቶ፡ (ቅድመ፡ እግዚአብሔር፡) ዘይገብር፡ ለለመዋዕል፡ ለእግዚአብሔር፡ ወአምጽኦ፡ ለወልዱ፡ ወሦዐ፡ ላህመ፡ ወአብአቶ፡ ሐና፡ እሙ፡ ለወልዳ፡ ኀበ፡ ኤሊ።
1 Samuel 1:27
ወትቤ፡ ስምዐኒ፡ እግዚኦ፡ ሐይወት፡ ነፍስከ፡ ከመ፡ አነ፡ ይእቲ፡ እንታክቲ፡ ብእሲት፡ እንተ፡ ቆምኩ፡ ቅድሜከ፡ ወበፃእኩ፡ በኀቤከ፡ ለእግዚአብሔር፡ በእንተ፡ ዝንቱ፡ ሕፃን፡ ወጸለይኩ፡ ወወሀበኒ፡ እግዚአብሔር፡ ስእለትየ፡ ዘሰአልኩ፡ በኀቤሁ።
1 Samuel 1:28
ወአነ፡ ወሀብክዎ፡ ለእግዚአብሔር፡ ኵሎ፡ መዋዕስ፡ ሕይወቱ፡ ይትቀነይ፡ ለእግዚአብሔር።