Nehemiah · source-local chapter 1
Nehemiah · source-local 1:1
ወኮነ፡ ወርኀ፡ ሴኬሉ፡ አመ፡ ዕሥራ፡ ዓመት፡ እንዘ፡ ሀሎኩ፡ በማእከለ፡ ሀገር።
Nehemiah · source-local 1:2
መጽአ፡ ሐናኒ፡ አሐዱ፡ እምአኀዊነ፡ ምስለ፡ ሰብአ፡ ይሁዳ፡ ወተስእልክዎሙ፡ በእንተ፡ አይሁድ፡ ወእለ፡ ተርፉ፡ እምነ፡ ፄዋ፡ ወበእንተ፡ ኢየሩሳሌም።
Nehemiah · source-local 1:3
ወይቤሉኒ፡ እለሰ፡ ድኅኑ፡ ወእለ፡ ተርፉ፡ እምእለ፡ ተፄወዉ፡ ህየ፡ ውስተ፡ ውእቱ፡ ብሔር፡ በዓቢይ፡ ሕማም፡ ወበብዙኅ፡ ተጽናስ፡ ወአረፋቲሃኒ፡ ለኢየሩሳሌም፡ ተነሥታ፡ ወአናቅጺሃኒ፡ ውዕያ፡ በእሳት።
Nehemiah · source-local 1:4
ወእምዝ፡ ሶበ፡ ሰማዕኩ፡ ዘንተ፡ ነገረ፡ በከይኩ፡ ወነበርኩ፡ ብዙኀ፡ መዋዕለ፡ እንዘ፡ እላሁ፡ ወእጼሊ፡ ወእጸውም፡ ቅድመ፡ አምላከ፡ ሰማይ፡ ወምድር።
Nehemiah · source-local 1:5
ወእቤ፡ ሐሰ፡ ለከ፡ እግዚኦ፡ አምላከ፡ ሰማይ፡ ወምድር፡ ዓቢይ፡ ወኃያል፡ ወግሩም፡ ዘተዓቅብ፡ ኪዳነከ፡ ወምሕረተከ፡ ለእለ፡ ያፈቅሩከ፡ ወለእለ፡ የዓቅቡ፡ ትእዛዘከ።
Nehemiah · source-local 1:6
ወይኩና፡ ክሡታተ፡ ዕዠኒከ፡ ወአዕይንቲከ፡ ከመ፡ ትርአይ፡ ወትስማዕ፡ ጸሎጸ፡ ገብርከ፡ እንተ፡ ጸለይኩ፡ ዮም፡ በዛቲ፡ ዕለት፡ መዓልተኒ፡ ወሌሊተኒ፡ በእንተ፡ ደቂቀ፡ እስራኤል፡ አግብርቲከ፡ ወንትጋነይ፡ ለከ፡ በእንተ፡ ኃጢአቶሙ፡ ለደቂቀ፡ እስራኤል፡ ዘአበሱ፡ ለከ፡ ወአነሂ፡ ወቤተ፡ አቡየ፡ አበስነ፡ ለከ፡ ወክሕድናከ።
Nehemiah · source-local 1:7
ወኢዐቀብነ፡ ትእዛዘከ፡ ወኵነኔከ፡ ወሕገ፡ ዘአዘዝኮ፡ ለሙሴ፡ ቊልዔከ።
Nehemiah · source-local 1:8
ተዘከርኬ፡ ቃለከ፡ ዘአዘዝኮ፡ ለሙሴ፡ ቊልዔከ፡ እንዘ፡ ትብል፡ እምከመ፡ ዓለውክሙኒ፡ አዘርወክሙ፡ አነኒ፡ ውስተ፡ ኵሉ፡ በሐውርተ፡ አሕዛብ።
Nehemiah · source-local 1:9
ወእመሰ፡ ተመየጥክሙ፡ ኀቤየ፡ ወዓቀብክሙ፡ ትእዛዝየ፡ ወገበርክምዎ፡ እመኒ፡ እስመ፡ አናጽፈ፡ ምድር፡ ተዘረውክሙ፡ አመጽአክሙ፡ እምህየ፡ ወአስተጋብአክሙ፡ ውስተ፡ ዝንቱ፡ ብሔር፡ ዘኃረይኩ፡ ከመ፡ ይኅድር፡ ስምየ፡ ውስቴቱ።
Nehemiah · source-local 1:10
እስመ፡ አግብርቲከ፡ እሙንቱ፡ ወሕዝብከ፡ እለ፡ ቤዘውከ፡ በኃይልከ፡ ዓቢይ፡ ወበእዴከ፡ ጽንዕት፡ ሐሰ፡ ለከ፡ አግዚኦ።
Nehemiah · source-local 1:11
ወዕዛኒከ፡ ያጽምዓ፡ ጸሎቶ፡ ለገብርከ፡ ወጸሎቶሙ፡ ለአግብርቲከ፡ እለ፡ ይፈቅዱ፡ ይፍርሁ፡ ስመከ፡ ወርድኦ፡ ለገብርከ፡ ወፈኑ፡ ሎቱ፡ ሣህለከ፡ በቅድመ፡ ዝንቱ፡ ንጉሥ፡ አንሰ፡ ሕፅው፡ ወአነ፡ አሰትዮ።